Luk 11 | MMX | STEP | At lara laaleng Iesu ga ngising to at lara lenep. La melemu at lisingising teren, lara laradi loklox ase ren ga lok tin, “Leeme Silok, una lox ase nema mi lisingising, kerekngan ne Jon ga lox ase luvuttadi loklok ka anasa ren.”

Luke 11

Iesu Ga Lox Ase Luvuttadi Loklok Ka Anasa Ren Mi

(Mt 6:9-13; 7:7-11)

1 At lara laaleng Iesu ga ngising to at lara lenep. La melemu at lisingising teren, lara laradi loklox ase ren ga lok tin, “Leeme Silok, una lox ase nema mi lisingising, kerekngan ne Jon ga lox ase luvuttadi loklok ka anasa ren.”

2 Iesu ga lok tinedi, “Mo do mina sing, miba vaase xeretna, Temen nema, mana lok ngangao at laasen taram. Linintoo ram na vot. 3 Unam taba nema mi leveluxa at levenaleng axap. 4 Doxoma xepe laxakapmek atnema, kerekngan nema ma doxoma xepe laxakapmek atnedi di lox i rinema; la nemen uta lok li nema ri leveloklok tong pen i lolos.”

5 La ne Iesu ga lok ti luvuttadi loklok ka anasa ren keretna, “Dola tara atnimi nat pas uto at loogu at lentangas teren at laxanimin tubu la na lok tin, ‘Lentangas tarak, una raba ia mi tavantun tengkongkide. 6 Lentangas tarak it pas at langas babaalom, mo vam i rupot to at loogu rak, la axo ruuna teveluxa kusu ri raba i min.’

7 La do lentangas taram na vorang levelinga ram to xeneng at loogu ren keretna, ‘Nemen uta lox angtang ia! Lumusaragu dira vipe vam i, la nema loxoetemen na mara unga vam. A noxo xatu kaxat bok ba la ana raba u mi tempanga anan.’ 8 A tong i rinimi, keke i do ixo xatu kaxat la ixo raba u mi lengkongkide mila neni lentangas taram, ketla neni naba xatu kaxat la na raba u mi lempanga axap nenu uk pakes tin mila nenu xa uxo mangan kusu una ngising aptaptangi.

9 Kuren la a tong i rinimi do, mina ngising, la miba ruuna xaka i; mina puse, la miba vuse xaka i; mina dipdi, la lumusaragu naba rem suang tinimi. 10 Mila, do mina ngising ne Moroa, miba lok kaka i; la do nemi mina puse, minaba vuse ka i; la lumusaragu naba rem suang tinimi mi dipdi.

11 Kereva, i epovo do temen lamdak na raba ne nitna mi tisii mo do neni na sing ti temat? 12 Kopla i epovo kusu neni na raba i mi laksoxomet mo do neni na sing ti taxabili pixa? Kopmen. 13 Keke i do mi bilinga, ketla miklen i do mim taba lempanga nunuan ti laxamdak atnimi. La kerepmo ne Moroa i nemen to vana at laxalibet naba raba Loroonan Kaala tinedi di ngising i!”

Iesu Ga Paase Mumu Ne Belsebul

(Mt 12:22-30; Mk 3:20-27)

14 Iesu ga riki xepe lagas gak lok at laradi kopmen goxo paase; se nom lagas ga sixisu, laradi ga lox epovo xusu na paase. Buaang limixin diga sangu. 15 Ketla lentaba luvuttadi diga lok, “Neni i riki asu lubunggas mi lololos at ne Belsebul, leeme gomgo at lubunggas.” 16 Lentaba diga vara i xusu dina lok tong pen i, kuren la diga sue i xusu na lok tavanga sangsangu xusu ri lox asuusu i do ne Moroa ga riki i.

17 Ketla ne Iesu gaklen levendoxoma atdi la ni ga tong lavapaase poovo ridi xeretna, “Dola tubungmixin di epes di ti lengkon binam tadi, la dia esep eburu minedi xa, kopmen noxo lok nunuan letuna atdi; loxoetemen do di epes di xusu ri esep, dinaba xis epeseves. 18 Kuren la mo do ne Satan eburu mi limixin teren dina epeseves ti legepu binam tadi la dina esep, lololos teren naba nemen babaalom kereva? Mi tong i do a lox asu lubunggas mila ne Belsebul i raba ia mi lololos kusu ri lox i. 19 Mo do nia a lox asu di mi lololos at ne Belsebul, kereva ba limixin sangsanga atnimi di lox asu di? Nedi di lox asuusu i do levelinga atnimi kopmen nak mokso! 20 Ket do a lox asu di mi lololos at ne Moroa, Linintoo at ne Moroa monga ira vot pam parap nimi.

21 Mo do laradi lolos na lox agagas li lempanga esep teren, la na lok tatao loogu lolos teren, mo lempanga axap teren ba nemen avukat. 22 Ket do tara taradi, lololos teren i volo i, na esep eburu min la na sev asi i, neni naba lok ka lempanga esep at nom laradi gak lok tatao loogu ren min, la na epes lempanga salai neni ga xip pilo xaka i.

23 Taradi do kopmen neni atarak, neni i munepen minia; la do tara kopmen nak lok tooro ia ti xup bubua ka laxasipsip, neni i sak epeseves laxasipsip.”

Lomlong At Lagas

(Mt 12:43-45)

24 Iesu ga lok keretna, “Dola lagas na sixisu basinge laradi, bat pas saasaa at lengkot, ba reven ti toxot kusu rin ti lok mamana. Mo do noxo vuse ka toxot, naba doma i xeretna, ‘Anamlong uto at no laradi, nenia aga on basinge i.’ 25 La neni bamlong la na long lenget ka i do mo loxot im games la ira lox avukat pam. 26 La neni bat pas la na lok ka bok lavanuti lubunggas, lololos atdi i volo i, la dibat pas la diba vubeles ap mo laradi. Kuren la mo laradi ba nemen kakapmek tino.”

Lomomo Ruturun

27 Se ne Iesu ga vaase axap na levelinga, lara latkin to xantubu at limixin ga lok ti ne Iesu keretna, “Moroa na lox anarong latkin ga visix u la ga lox asilox u!”

28 Ketla ne Iesu ga vorang i rin keretna, “I ruturun, ketla nedi mun di ronga levelinga at ne Moroa la di mumu asu i, Moroa naba lox anarong di.”

Limixin Diga Sing Ne Iesu Kusu Na Lok Tavanga Sangsangu

(Mt 12:38-42)

29 Se limixin diga umsu saparap ne Iesu, neni ga lok tidi xeretna, “Limixin at na levenaleng nedi limixin kakapmek tinotno! Di sue ti tavanga sangsangu, ketla kopmen a noxo lok tara ridi, ketla diba doma mumu mun leretere at ne Jona. 30 Lugugu at ne Jona neni lampoovo rinedi limixin boro Nineve; la kerepmo lugugu at Laradi Mevana neni lampoovo tinedi limixin at na levenaleng. 31 At laaleng ete latkin gomgo boro Seba naba xatu kaxat la na tong asu laxakapmek atnimi limixin at na levenaleng, mila neni ga vas kaxat boro vaxalom tinotno xusu na ronga levenanasa at ne Solomon; ketla a tong i rinimi do lara laradi ik lok pam kantubu atnimi, neni i silok ti ne Solomon. 32 At laaleng ete limixin boro Nineve dinaba ru kaxat la dina tong asu laxakapmek atnimi, mila diga leeng basinge laxakapmek atdi at nom laaleng diga ronga ne Jona ga vavang tidi; la a tong i rinimi do lara laradi ik lok kantubu atnimi neni i silok ti ne Jona.”

Lavapaase Poovo Ti Laxasep I Nemen Keneng At Labantuxu

(Mt 5:16; 6:22-23)

33 La ne Iesu ga lok keretna, “Kopmen taradi na sox aros lababao la na lok li alipe i xopla na lok li i ro maxopok at lavatbaaket; ketla neni i lok li i ro at loxot lababao i tu e, kusu limixin diba reven at laxasep teren do dina beles. 34 Lengkatli atnimi i ngan laxasep ti lorooro atnimi. Dola lengkatli i reven ti lempanga avukat, lorooro atnimi mo ba umsu mi laxasep; ket do lengkatli atnimi i reven ti lempanga xapmek, lorooro atnimi naba nemen at lamain. 35 Mina lok tatao avukat nimi, kusu lorooro axap atnimi noxo umsu mi lamain. 36 Do lorooro axap atnimi naba umsu mi laxasep, la kopmen tekot main go xeneng teren, nom lorooro axap taram nabam games, kerekngan mun lababao i lox axasep labantuxu mi losoosoo ren.”

Laxakapmek At Lubung Parisi

(Mt 23:1-36; Mk 12:38-40)

37 Se ne Iesu ga vaase axap, lara atdi lubung Parisi ga lam ka i xusu na anan eburu min; la neni ga vubeles ukeneng at loogu la ga xis kopok kusu dina anan. 38 Mo la Parisi ga rakdu aleng mila neni ga ven ne Iesu kopmen goxo gos avot be lukngen kusu ri anan.

39 La Leeme Silok ga lok tin, “Nemi lubung Parisi mi gos anunuan no maxamang at lakap inin mi lavanga tingtigon, ketla no maxeneng atnimi, nemi mi umsu mi loklok ti belegaao la loklok kakapmek bok. 40 Nemi limixin tangtangku! Kereva, kopmen ne Moroa goxo rudum i no maxamang la no bok maxeneng? 41 Ketla mina raba lempanga salai no i nemen at lengkap mi levempelet atnimi tinedi limixin banbalo, la lempanga axap nabam games tinimi.

42 Naba lok kapmek tinotno rinimi, lubung Parisi! Mi raba ne Moroa mi lenep avot at lasangaun at lempanga, i ngan levengkuma mi leveloombo la lempanga vetpes bok; ketla nemi mi sok tixirixes loklok mokmokso la labalamu at ne Moroa. Anai nemi mina lox i, la nemen mita sok tixirixes nom loklok ti raba ne Moroa mi lenep avot at lasangaun at lempanga.

43 Naba lok kapmek tinotno tinimi lubung Parisi, mila mi vavara aleng lengkot kitkis to melamgo at laraugu singising; la mi vavara i do limixin dina seega rangarang nemi mi loklok ngangao ro at lengkot etang.

44 Naba lok kapmek tinotno rinimi! Nemi mi lok ngan lara maaut kopmen di goxo lok katling di, la limixin dit pas teren la kopmen dinaklen laxakapmek ik lok teren.”

45 Lara laradi loklox ase at Lenavolo ga lok ti ne Iesu, “Leeme loklox ase, ise nenu u tong i na, nenu u vaase sok bok nama.”

46 Iesu ga vorang i rin keretna, “Naba lok kapmek tinotno bok tinimi luvuttadi loklox ase at Lenavolo mila mi lok li levenaknixip melemu at levenantuno atdi limixin, la i lolos aleng kusu dinap kiv i, ketla nemi xa kopmen mina song asu lixilik mi tanatsivisip atnimi xusu mina lok tooro di tip kip mo lumumuat.

47 Naba lok kapmek tinotno rinimi! Mila miga lok lara maaut nunuan kusu ri lavaeme vapaase alii megano, ua lavalabat atnimi diga sev amet di. 48 La kerepmo nemi xa mi lox asuusu i do, nemi xa miga siam ap mo laxakapmek lavalabat atnimi diga lox i; mila diga sev amet lavaeme vapaase alii, la nemi miga lok lara maaut tidi. 49 Kuren la ne Moroa mi lakleklen silok teren ga lok, ‘Aba riki lavaeme vapaase alii la luvuttadi vavang, la lentaba atdi diba sev amet di la lentaba diba lox asongot di.’ 50 Kuren la limixin at nai levenaleng dibap kip langsangan lumumuat mumu laniu at lavaeme vapaase alii axap ga ru ka i at laaleng at ne Moroa ga rudum li na lavatbung menemen, 51 at laniu at ne Abel ga se at laniu at ne Sakaria, no lavalabat atnimi diga sev amer i ro xantubu at loxot kokotos taba levempanga e xusu ri ne Moroa la loxot i xaala. I ruturun tinotno. A tong i rinimi do limixin at na levenaleng dinabap kip langsangan lumumuat mumu nedi axap!

52 Naba lok kapmek tinotno rinimi, luvuttadi loklox ase at Lenavolo! Nemi xa mi rebeng alis lolos levelinga at ne Moroa i tong asu langas ti ruuna ka lorooro; ketla nemi xa kopmen mina xasep teren, la mi lok pe nedi di lok do dina lok kaka i.”

53 Se ne Iesu ga vas kaxat basinge mo loxot, luvuttadi loklox ase at Lenavolo la lubung Parisi diga ru ka i xusu dina lox abulubun kepe i la diga sue i mi laxasusue. 54 La kerepmo diga puse ngas kusu dina lok li ne Iesu at lavapaase silok mo do ni na tong kapmek toxolinga.